Turli nashrlar tomonidan tarqatilgan xabarlarga koʻra, Andijon viloyat IIBning qator mansabdor shaxslari hibsga olingan.Qayd etilishicha, ushlanganlar qoʻlida jabr koʻrganlardan 150 nafarga yaqini hozirda rasman shikoyat qilgan.
Kun.uz ushbu holatga oydinlik kiritishni soʻrab, Bosh prokuratura matbuot xizmati rahbari Surayyo Rahmonovaga murojaat qildi.
“Hozirda ayrim IIB xodimlariga nisbatan qoʻzgʻatilgan jinoyat ishi yuzasidan tergov harakatlari olib borilmoqda”, - dedi Bosh prokuratura rasmiy vakili.
Uning soʻzlariga koʻra, Andijon viloyati IIB Jinoyat-qidiruv boshqarmasining ayrim xodimlarga nisbatan Jinoyat kodeksining 206- (Hokimiyat yoki mansab vakolati doirasidan chetga chiqish), 234- (Qonunga xilof ravishda ushlab turish yoki hibsga olish) moddalari bilan 2018 yil 19 dekabr kuni Bosh prokuratura tomonidan jinoyat ishi qoʻzgʻatilib, ularga qamoq ehtiyot chorasi qoʻllanilgan.
Mazkur jinoyat ishi tergovi Bosh prokuraturaning oʻta ogʻir jinoyatlarni tergov qilish boshqarmasi yurituvida.
“Bu ish yuzasidan qonuniylik taʼminlanadi”, - deydi Surayyo Rahmonova.