O‘zbekiston Respublikasi IIV Jinoyat qidiruv bosh boshqarmasi Korrupsiya va iqtisodiy jinoyatlarga qarshi kurashish boshqarmasidan olingan xabarga ko‘ra, shu yilning 11 oktyabr kuni Namangan viloyati Ichki ishlar boshqarmasiga N.O. ariza bilan murojaat qilgan.U o‘z arizasida 2018 yil 10 oktyabr kuni molxona qurish uchun yer maydoni ajratish yuzasidan Mingbuloq tumani hokimligiga borganida, u yerda bo‘lgan X.M. fermer xo‘jaligi rahbari bo‘lmasa-da, o‘zini tumandagi “Shuhrat Abdulqosimovich” nomli fermer xo‘jaligi rahbari deb tanishtirib, N.O.ning ishonchiga kirib, unga o‘zining fermer xo‘jaligiga tegishli bo‘lgan 6,5 gektar yer maydoniga molxona qurish uchun tuman hokimi qarorini chiqartirib berishini aytib, evaziga 50 ming AQSh dollari berishini so‘rayotganligini ma’lum qilgan.
Mazkur arizaga asosan, shu kuni Namangan viloyati IIB hamda Namangan viloyati prokuraturasi xodimlari hamkorligida o‘tkazilgan tezkor tadbir natijasida, Mingbuloq tumanidagi “Shuhrat Abdulqosimovich” fermer xo‘jaligi ish yurituvchisi bo‘lib ishlovchi X.M. Namangan shahrining Go‘zal dahasida ariza muallifi N.O.dan talab qilingan pullardan 10000 AQSh dollarini olgan vaqtida ashyoviy dalillar bilan ushlandi.
Ushbu holat yuzasidan Namangan viloyati prokuraturasi tomonidan X.M.ga nisbatan O‘zbekiston Respublikasi Jinoyat kodeksining 168-moddasi 3-qismi, 28-moddasi va 211-moddasi 2-qismi bilan jinoyat ishi qo‘zg‘atilib, ehtiyot chorasi tariqasida qamoqqa olingan.