Normativ-huquqiy hujjatlar loyihalarini muhokama qilish portalida Vazirlar Mahkamasining “O‘zbekiston Respublikasi fuqarolarini Toshkent shahri va Toshkent viloyatida doimiy propiska qilish va turgan joyi bo‘yicha hisobga olish tartibi to‘g‘risidagi nizomga qo‘shimchalar kiritish haqida”gi qarori loyihasi e’lon qilindi.Hujjat bilan Vazirlar Mahkamasining 2012 yil 16 fevraldagi 41-son qarori (O‘zbekiston Respublikasi QT, 2012 y., 5-son, 32-modda) bilan tasdiqlangan O‘zbekiston Respublikasi fuqarolarini Toshkent shahri va Toshkent viloyatida doimiy propiska qilish va turgan joyi bo‘yicha hisobga olish tartibi to‘g‘risidagi nizomning 4-bandi beshinchi va oltinchi xatboshilari quyidagi tahrirda bayon qilinishi mumkin:
“turar joy uchun hujjatlarning nusxalari, ro‘yxatning 5-bandi bo‘yicha doimiy propiska qilinadigan shaxslar bundan mustasno;
uy-joy mulkdorining (mulkdorlarining) turar joy maydoni berish to‘g‘risidagi arizasi (roziligi) yoxud notarial tasdiqlangan arizasi (roziligi), agar shaxsan o‘zi berish imkoni mavjud bo‘lmasa, ro‘yxatning 5-bandi bo‘yicha doimiy propiska qilinadigan shaxslar bundan mustasno;”.
O‘zbekiston Respublikasi Ichki ishlar vazirligi manfaatdor vazirliklar va idoralar bilan birgalikda ular tomonidan qabul qilingan normativ-huquqiy hujjatlarni ushbu qarorga muvofiqlashtiradi.
Mazkur qarorning bajarilishini nazorat qilish O‘zbekiston Respublikasi Ichki ishlar vaziri P.R. Bobojonov zimmasiga yuklanadi.