Yosh yigit Ka’bada turib faqat:"Ey to‘g‘rilarning, haromdan hazar qilgan bandalarining yordamchisi - Allohim, Senga hamdu sanolar bo‘lsin!" - deya takrorlardi.
Yonidagi kishilardan biri hayratlanib so‘radi:
- Birodar, nega faqat 1 ta jumlani qaytaryapsiz, boshqa so‘raydigan tilagingiz yo‘qmi?
Yigit bir pas jim turgach, o‘z holatiga shunday izoh berdi:
- Bundan 7-8 yil oldin ham ziyoratga kelganimda, Ka’badan ming tilla tanga solingan hamyon topib oldim.
Ichimda vasvasa boshlandi: "Oltinlarni olu cho‘ntagingga sol. Endi ular seniki, istaganingcha xarjlasang bo‘ladi..."
Lekin bu gaplar shaytondan ekanligini o‘z - o‘zimga uqtirdim: "Yo‘q, bu pullar meniki emas, ulardan foydalanishim harom".
Shu asno: "Hamyonimni yo‘qotdim, topib olgan bormi?" - degan ovoz eshitildi. Haligi odamdan hamyonning ta’rifini, ichida qancha pul bo‘lganligini so‘radim.
Gaplaridan hamyon unga tegishliligi ma’lum bo‘ldi - omonatni egasiga topshirdim.
U menga suyunchi deb 30 tilla tanga berdi. Qo‘limda pul bilan bozorga yo‘l oldim va u yerda bir asir bolani maqtab sotishayotgani ustidan chiqdim.
Boyagi bolaning toza - pokizaligi e’tiborimni tortdi.
Narxini so‘radim, 30 tilla ekanini aytishdi. Pulni berib, asir bolani sotib oldim. Oradan bir - ikki yil o‘tdi. Bola menga odob va sadoqat bilan xizmat qildi. Bir kuni u bilan birga ketar ekanmiz, qarshimizdan uch kishi chiqdi.
Shunda bola menga:
"Xojam, sizga bir sirni ochay - men Fas amirining o‘g‘liman. Kelayotgan kishilar esa otamning odamlari.
Ular meni sotishingizni so‘raydilar, siz yaxshi odamsiz, 30 ming oltindan kamiga ko‘nmang.
Qo‘rqmang, ular sizga zarar yetkazishmaydi", dedi.
Shunday qilib asirimni o‘ttiz ming tillaga sotdim. Bu pullar bilan katta tijorat boshladim va tez orada boyib ketdim.
Shunday kunlarning birida yaqinlarim: "Obro‘li bir oilaning qizi bor, otasi yaqinda vafot etdi. Seni shu qizga uylantirmoqchimiz", deb qolishdi.
Men rozi bo‘ldim.
To‘y bo‘ldi, nikoh kechasi kelinning seplari orasida bir hamyon diqqatimni tortdi. Rafiqamdan: "Bu nima?" - deb so‘radim.
U: "Otamning hamyoni, ichida 970 tilla tanga bor. Otam bu hamyonni bir yili Ka’bada yo‘qotgan, topib bergan kishiga 30 tangasini bergan ekanlar. Qolganini esa menga hadya qilib, sepimga qo‘shganlar".
Qarangki, o‘shanda Ka’bada men topib olgan oltinlar aslida ham rizqim ekan. Agar egasiga bermaganimda harom yo‘l bilan kelgan bo‘larkan...
Takdirimizda biz uchun atalgan rizqimizga albatta ega bo‘lamiz, fakat harom yeki halol yo‘l orkali ega bulishni o‘zimiz xal qilamiz...
Manba: Azon.uz