Sergeli tumanida joylashgan “Iste’molda bo‘lgan transport vositalari va ehtiyot qismlari bozori” hududida turgan “Damas” rusumli avtoulovning narxi 1200000 so‘m bo‘lgan orqa tortish moslamasini noma’lum shaxs o‘g‘irlab, voqea joyidan yashiringan. Bu haqda IIV Huquqbuzarliklar profilaktikasi bosh boshqarmasi xabar berdi.Sergeli tumani IIB profilaktika inspektorlari tomonidan ko‘rilgan tezkor choralar natijasida ushbu o‘g‘rilikni Toshkent viloyatining Zangiota tumanida yashovchi 1997 yilda tug‘ilgan Z.D. sodir etgani aniqlanib, ushlandi. Undan ashyoviy dalil sifatida ehtiyot qism olindi.
Fuqaro Z.D.ga nisbatan O‘zbekiston Respublikasi Jinoyat kodeksining 169-moddasi 1-qismi, o‘g‘rilik, ya’ni o‘zganing mol-mulkini yashirin ravishda talon-taroj qilish alomatlari bilan jinoyat ishi ko‘zg‘atilgan. Hozirda tergov harakatlari olib borilmoqda.