Prezidentimiz Farmoni bilan ta’sis etilib, 2003 yildan buyon «Kamolot» yoshlar ijtimoiy harakati tomonidan topshirib kelinayotgan «O‘zbekiston belgisi» ko‘krak nishoni ijtimoiy-siyosiy hayotida namuna ko‘rsatayotgan, har jabhada faol va o‘z tengdoshlariga haqiqiy ibrat bo‘layotgan yoshlarga berilishi an’anaga aylangan, Bu haqda «UzA»ga asoslanib «Kun.uz»
xabar bermoqda.
Mazkur ko‘krak nishoniga nomzod yoshlarning soni yildan yilga ortib bormoqda. Jumladan, 2013 yilda Respublika komissiyasiga 800ga yaqin yoshlardan hujjat kelib tushgan bo‘lsa, 2014 yilda ularning soni 950dan ortiqni tashkil etdi.
Joriy yilda ilm-fan, madaniyat, ta’lim, sog‘liqni saqlash, san’at, jurnalistika, sport, qishloq xo‘jaligi, kichik biznes, huquq va harbiy sohalarda o‘qiyotgan, ishlayotgan hamda ilmiy-ijodiy faoliyat bilan shug‘ullanib, yuksak natijalarga erishayotgan 28 nafar yoshga «Kamolot» yoshlar ijtimoiy harakati Markaziy Kengashi qaroriga binoan «O‘zbekiston belgisi» ko‘krak nishoni topshirildi. Endi bu mukofotga loyiq ko‘rilganlar soni 409 kishiga etdi.
Tadbirda O‘zbekiston Respublikasi Bosh vazirining o‘rinbosari A.Ikromov so‘zga chiqdi. Taqdirlash marosimida shuningdek, davlat va jamoat arboblari, vazirlik, idora va muassasalarning mutasaddi rahbarlari, «Kamolot» yoshlar ijtimoiy harakatining etakchilari va faollari, ko‘krak nishonini qo‘lga kiritgan yoshlar, ommaviy axborot vositalari vakillari qolaversa, estradamiz xonandalari ishtirok etishdi.
Tantanali marosimdan so‘ng, mukofotlangan yoshlar Mustaqillik maydonidagi "Mustaqillik va ezgulik" monumenti poyiga gulchambar qo‘yishdi.
Foto: Kun