9 sentyabr kuni O‘zbekiston Respublikasi Markaziy saylov komissiyasining majlisi bo‘lib o‘tgani, O‘zbekiston Respublikasi Konstitusiyasining 96, 117-moddalari hamda “O‘zbekiston Respublikasi Prezidenti saylovi to‘g‘risida”gi Qonunning 8-moddasiga, “O‘zbekiston Respublikasi Markaziy saylov komissiyasi to‘g‘risida”gi Qonunning 5 va 9-moddalariga muvofiq 2016 yil 4 dekabr, yakshanba kunini O‘zbekiston Respublikasi Prezidenti saylovi kuni deb belgilash to‘g‘risida qaror qabul qilingani haqida xabar bergan edik.Markaziy saylov komissiyasi joriy yilning 9 sentyabridan O‘zbekiston Respublikasi Prezidenti saylovi bo‘yicha saylov kampaniyasi boshlanganligini e’lon qildi.
O‘zbekiston Respublikasi Markaziy saylov komissiyasi O‘zbekiston Respublikasi Prezidenti saylovini yoritish bo‘yicha mamlakatimiz va chet el jurnalistlarini akkreditasiyadan o‘tkazishga ham start berilganini ma’lum qildi.
Jurnalistlar akkreditasiyadan o‘tishi uchun joriy yilning 1 dekabriga qadar O‘zbekiston Respublikasi Prezidenti saylovini yoritish bo‘yicha Respublika matbuot markaziga quyidagi hujjatlarni taqdim qilishlari lozim:
O‘zbekiston Respublikasi Markaziy saylov komissiyasi raisi Mirzo Ulug‘bek Abdusalomov nomiga OAV tashkilotining rasmiy blankasida jurnalistni akkreditasiyadan o‘tkazish to‘g‘risidagi ariza;
akkreditasiyadan o‘tadigan jurnalistning o‘lchami 3,5x4,5 sm bo‘lgan ikki dona fotosurati;
OAV tashkilotining davlat ro‘yxatidan o‘tganligi to‘g‘risidagi guvohnoma nusxasi, elektron OAV uchun – efirga uzatish lisenziyasining nusxasi, xorijiy jurnalistlar uchun – O‘zbekiston Respublikasi Tashqi ishlar vazirligida akkreditasiyadan o‘tganligi haqidagi hujjatning nusxasi.
Ko‘rsatilgan ma’lumotlardan iborat bo‘lmagan yoki jurnalistning ularga ilova qilinmagan fotosuratlarisiz ariza ko‘rib chiqish uchun qabul qilinmaydi, deyiladi xabarda.