Rossiya hududida odam savdosi bilan shug‘ullanganlikda ayblanib qo‘lga olingan Bekjon Xudoyqulov O‘zbekiston huquqni muhofaza qilish organlari ixtiyoriga jo‘natildi. Bu haqida Rossiya federasiyasining Bosh prokuraturasi matbuot xizmatiga asoslanib, "podrobno.uz" nashri xabar bermoqda.
2012 yil yanvarida Bekjon Xudoyqulov O‘zbekistonda bir qancha tanishlarining ishonchiga kirib, ularni Rossiya hududiga ishlash uchun taklif qiladi va hamrohlari bilan Novosibirsk shahriga boradi. Bu shaharda ularni Xudoyqulovning otasi kutib oladi hamda aldangan hamyurtlarining pasportlarini tortib olib, jabrlanuvchilarni ozarboyjonlik odamga sotib yuboradi. Lekin, o‘shanda ko‘p o‘tmasdan, Bekjon Xudoyqulov rus polisiyasi tomonidan hibsga olingan edi.
"Bu jinoyat uchun Rossiya qonunlariga ko‘ra, 10 yillik qamoq muddati tayinlanadi. Lekin, O‘zbekiston tomonining so‘roviga binoan Bekjon Xudoyqulov Toshkentga jinoiy javobgarlikka tortilishi uchun qaytarib yuborildi "- deyiladi Rossiya bosh prokuraturasida e’lon qilingan xabarda.