O‘zbekiston oliy ta’lim muassasalariga 663,2 mingdan ziyodroq abiturient hujjat topshirdi. Qabul kampaniyasi 20 iyul kuni yakuniga etdi.Vazirlar Mahkamasi qoshidagi Davlat test markazi ma’lumotlariga ko‘ra, bir talaba o‘rni uchun 11,5 kishi kurash olib boradi. Bakalavrlar qabul kvotasi o‘tgan yilgidan taxminan 300 o‘rin kamroq bo‘lib, 57,6 mingni tashkil etadi.
Eng ko‘p Termiz davlat universiteti (37,6 ming ariza, bir o‘ringa 20,45 nomzod), Qarshi davlat universiteti (26,3 ming, 18,88) va Andijon davlat universiteti (25,9 ming, 18,28)ga hujjat topshirildi.
Bir o‘ringa eng ko‘p tanlov Toshkent tibbiyot akademiyasi Farg‘ona filialida qayd etildi — 24,8 kishi.
O‘tgan yili mamlakatdagi OTMlarga 606 mingdan ortiq abiturient hujjat topshirib, bir o‘ringa 10,45 nomzod kurash olib borgan edi.
O‘zbekistondagi barcha 58 OTMda (chet el OTMlari hisobga olinmaganda) test sinovlari 1 avgust kuni bo‘lib o‘tadi.