Ijtimoiy tarmoqlar va Telegram messenjerida poytaxtdagi “Yakkasaroy” restoranining buzilishi bilan bog‘liq xabarlar tarqaldi. Tarmoq foydalanuvchilari tarqatayotgan norasmiy ma’lumotlarga qaraganda, restoran joylashgan Abdulla Qahhor ko‘chasidagi avtomobil yo‘li kengaytirilib, ko‘p qavatli uy qurilishi rejalashtirilgan.Internet orqali tarqalgan gap-so‘zlar tez orada katta shov-shuvlarga sabab bo‘ldi. Biz mazkur masala yuzasidan Toshkent shahar hokimiyati Matbuot xizmati bilan bog‘landik. Go‘shakni ko‘targan Matbuot xizmati rahbari Husan Ermatov “Yakkasaroy” restoranining buzilishi bilan bog‘liq gaplarga quyidagicha javob berdi.
“Yakkasaroy” restoranining buzilishi va o‘rniga ko‘p qavatli uy qurilishi haqidagi gaplarni sizdan eshityapmiz. Bu bo‘yicha hech qanday rasmiy hujjat qabul qilinmagan, shuning uchun ortiqcha vahimaga o‘rin yo‘q”, deydi Husan Ermatov.
Toshkent shahar hokimiyati vakillarining javobini eshitgach, restoran ma’muriyati bilan bog‘landik. Go‘shakni ko‘targan restoran xodimi o‘zini Sirojiddin deb tanishtirdi. Savollarga bamaylihotir javob bergan “Yakkasaroy” vakili restoranning buzilishi bilan bog‘liq gap so‘zlar quruq bo‘hton ekanini ta’kidladi.