7 iyul kuni Qozog‘istonning Olma-ota viloyatida tug‘ilganiga bir necha daqiqa bo‘lgan farzandini hojatxonaga tashlab ketgan ayol qo‘lga olindi. Bu haqda “Qalampir.uz” xabar bermoqda.Polisiya tomonidan qo‘lga olingan ayol aybini tan oldi va ko‘rsatma berdi. Uning so‘zlariga ko‘ra, ayol qizaloqni hojatxonada dunyoga keltirgan. Go‘dak hojatxona teshigidan pastga tushib ketganiga amin bo‘lgach, ayol yuvinib, taranib, xuddi hech narsa bo‘lmagandek yotib uxlagan.
Kecha onasi topilgan go‘dakning dunyoga kelganiga bugun bir necha kun bo‘ldi. Aksha qishlog‘ida istiqomat qiladigan keksa ayolning aytishicha, xovlining orqa tomonidan chirqirib yig‘lagan go‘dak ovozi eshitilgan. Hojatxona ichiga kirgan ayol chuqurda yig‘lab yotgan bolani ko‘rib, qo‘rqib ketgan va yordamga o‘g‘lini chaqirgan. Birgalikda ular vaqtinchalik qurilgan hojatxonadagi oyoq osti to‘shalgan taxtalarni olib tashlashgan va chuqur ichidan bolani chiqarib olishgan. G‘aroyib “topilma” haqida tez yordam va polisiyaga mahalliy aholi vakillari xabar berishgan. Go‘dak o‘sha zahotiyoq shifoxonaga etkazilgan. Shifokorlar qizaloqning miyasi chayqalgani, tanasining bir necha qismi ko‘karganini qayd etishgan. Hozir uning ahvoli yaxshi.
Kecha, o‘z jigarbandini o‘lim bilan yuzma-yuz tashlab ketgan ayol qo‘lga olindi. Qorasaroy tumanida istiqomat qiluvchi 22 yoshli qiz, Aksha qishlog‘iga buvisinikiga farzandini dunyoga keltirish uchun atay kelganini, oila a’zolaridan hech kim bu haqda xabar topishini istamaganini aytgan. To‘lg‘oq boshlangach, ayol hojatxona tomon yo‘l olgan va bola tug‘ilib, hojatxona chuquriga tushib ketganiga amin bo‘lgach, hech narsa bo‘lmagandek yuvinib pinakka ketgan.
Ma’lumotlarga ko‘ra, ayol turmushga chiqmagan va farzandi nikohsiz tug‘ilayotganini oila a’zolari bilishini istamagan. Tabiiyki, uning homiladorligi haqida buvisi ham bilmagan. U yaqinda farzandli bo‘lishini barchadan yashirishga urunib shunday yo‘l tutgan. Endi esa uni jinoiy javobgarlik kutmoqda.