Birlashgan arab amirliklarida yashovchi ayol turmush o‘rtog‘ining telefonini tekshirgani uchun katta miqdorda jarima to‘laydi, deb xabar beradi “Darakchi” nashri.Ayol turmush o‘rtog‘ining telefonidagi kirish-chiqish qo‘ng‘iroqlari va WhatsApp messenjeridagi yozishmalarni tekshirganidan so‘ng, erini xiyonat qilayotganlikda aybladi. Bunga javoban esa ayolning eri sudga murojaat qilib, xotinini qilgan ishi uchun jinoiy javobgarlikka tortishni so‘ragan. Endilikda ayol mamlakat hududidan deport qilinishi ham mumkin.
Ayol erining telefonidagi yozishmalar va kirish-chiqish qo‘ng‘iroqlari haqidagi ma’lumotning o‘zi bilangina cheklanmadi. U erining mashuqasi jo‘natgan suratlarni ham ashyoviy dalil sifatida saqlab qo‘ygan edi. Ayol BAA fuqarosi bo‘lmagani uchun erkak uning ustidan sudga arz qildi. Natijada ayolni telefon egasining ruxsatisiz uning telefonidagi surat va boshqa ma’lumotlarni olgani uchun 28 ming evro miqdoridagi jarimaga tortishdi.
Mamlakat qonunlariga ko‘ra, bunday turdagi qonunbuzarlikni sodir etgan shaxslarga nisbatan olti oydan boshlab qamoq jazosi qo‘llaniladi. Biroq sud qonunbuzar ayolni mamlakatdan deport qilish masalasini ko‘rib chiqmoqda.