O‘zbekiston Respublika valyuta birjasida 29 avgust kungi savdolar natijasida so‘m 1 AQSh dollariga nisbatan qadrsizlandi. Bundan valyuta birjasidagi ma’lumotlar darak beryapti.Xususan, 28 avgust kungi savdolarda 1 AQSh dollari 9382 so‘mdan sotilgan bo‘lsa, 29 avgustda bu ko‘rsatkich 1 AQSh dollariga 9403 so‘mni tashkil etdi. Shu tariqa, birjada dollar kursi ilk marta 9400 so‘mlik nuqtadan o‘tdi.
29 avgust kuni birjada savdolar hajmi 97,89 mln dollarni tashkil qildi. Bir kun avval - 28 avgust kuni ushbu ko‘rsatkich 107,74 mln dollarga teng bo‘lgandi.
Bundan oldin so‘m iyul oyida mustahkamlangandi, o‘shanda 1 AQSh dollari uchun 8659 so‘mdan sotilgan, so‘ng eng yuqori ko‘rsatkichga ko‘tarildi va 20 avgustda 1 AQSh dollari uchun 9384 so‘mdan savdo qilindi. Savdolar hajmi 154 million dollargacha keskin o‘sdi - bunday holat iyun oyidan beri sodir bo‘lmagan.
20 avgust kuni Markaziy bank valyuta kurslari endi bozorda mustaqil shakllanishi haqida ma’lum qildi.
«Markaziy bank tomonidan valyuta uchun belgilangan 0.5 foizli kurs tebranishi bekor qilindi. Bu farq endi valyuta sotuvchilar va sotib oluvchilar tomonidan belgilanishiga qaror qilindi. 0,5 foizli chegirmaning borligi valyuta bozori ishtirokchilari manfaati uchun zid, degan qarorga kelindi», - deya aytib o‘tdi Markaziy bank raisi Mamarizo Nurmuratov.