14-avgust kuni oʻtgan yigʻilishda prezident Shavkat Mirziyoyev narxlarning keskin oshib ketishining oldini olish masalasiga alohida eʼtibor qaratgan. Bu haqda prezident matbuot xizmati xabar berdi.Dastlabki 6 oyda inflyatsiya 5,6 foizni tashkil qilib, prognoz koʻrsatkichlaridan oshmagan. Lekin tariflar va narxlar bosqichma-bosqich bozor mexanizmlariga oʻtayotgani bois mutasaddilarga inflyatsiya oʻsishining oldini olish boʻyicha zarur choralar koʻrish topshirilgan.
Avgust oyi boshida oʻtkazilgan yigʻilishda kichik biznes va xususiy tadbirkorlikni rivojlantirish masalasi atroflicha muhokama qilinib, bu borada yangi tizim joriy etish belgilangan edi. Iqtisodiyot va sanoat vazirligi huzurida Kichik biznes va tadbirkorlikni rivojlantirish agentligi tashkil etilib, unga Tadbirkorlikni qoʻllab-quvvatlash jamgʻarmasi, tijorat banklari va sugʻurta kompaniyalari biriktirilgandi.
Yigʻilishda davlat rahbari ushbu yangi tizimni joylarda joriy etish orqali keng aholini tadbirkorlikka jalb qilish, ularning bandligi va daromadini oshirish zarurligini aytgan.
– Oxirgi bir yilda yalpi ichki mahsulot tarkibida sanoat ulushi 26 foizdan 30 foizga yetgan boʻlsa-da, bu biz boshlagan islohotlar koʻlamiga nisbatan hali yetarli emas, – degan Shavkat Mirziyoyev.
Joriy yil oxiriga qadar Navoiy kon-metallurgiya kombinatida 25 ta, “Oʻzeltexsanoat”da 18 ta, “Oʻzavtosanoat”da 7 ta, Olmaliq kon-metallurgiya kombinatida 5 ta investitsiya loyihasi boʻyicha yangi quvvatlar ishga tushirilishini jadallashtirish boʻyicha tavsiyalar berilgan.
Joriy yilning birinchi yarmida mamlakat yalpi ichki mahsuloti 5,8 foiz, sanoat mahsulotlari ishlab chiqarish hajmi 6,9 foiz oʻsgan. Mahalliy byudjetlar ixtiyorida 2,6 trillion soʻmdan ziyod yoki oʻtgan yilning mos davriga nisbatan 1,5 barobar koʻp mablagʻ qoldirilgan. Byudjet daromadlari qariyb 51 trillion soʻmni yoki prognozga nisbatan 109 foizni tashkil etgan.