Shvetsiyalik olimlar it va mushuk egalari uyida hayvon boqmaydiganlarga ko‘ra 15-20 yil uzoq umr ko‘rishlarini isbotlashdi. Dagens Nyheter (Shvetsiya) gazetasining yozishicha, it va mushuklar insonlarni stresslardan asrashadi. Ayniqsa itlar insonga juda ham ko‘p ijobiy hissiyotlar taqdim etadilar. Bu esa sog‘liqqa, 40 yoshdan oshgan insonlarga ijobiy ta’sir ko‘rsatadi va sog‘lig‘ini yaxshilaydi, stress orqali kelib chiqadigan yurak va qon tomir kasalliklari (infarkt, xafaqon)ni oldini oladi.
Upsal universitetining professori Tuve Fall 12 yil davomida bu bo‘yicha tadqiqot o‘tkazgan va 40-80 yoshli yurak–qon tomir kasalliklari mavjud shvedlarni it va mushuk boqadigan hamda boqmaydiganlarga ajratib kuzatgan. Natijalarga ko‘ra it va mushuk boqadigan odamlarda kasallik bo‘yicha o‘lim holati 20% ga kam ekanligi aniqlangan.
