Foto: «RIA Novosti»Britaniyalik va kanadalik shifokorlar koronavirusga chalinganini hali bilmagan odamda yangi virusni yuqtirganlikka ishora qiluvchi eng keng tarqalgan to‘rtta alomatni aniqlashdi, deya xabar berdi «Express».
Koronavirusga chalingan har beshinchi bemor oshqozon bilan bog‘liq muammolardan qiynaladi, deb yozadi maqola muallifi bir qancha tadqiqot ma’lumotlariga tayanib. Gastroenterologiya alomatlari orasida ishtaha yo‘qolishi, ko‘ngil aynishi, qayt qilish va qorin og‘rig‘i bor.
«Ushbu alomatlar bemorda albatta COVID-19 borligini anglatmaydi», — deydi Albert universiteti olimi Mitch Uilson. Shunga qaramay, bu alomatlarni e’tiborsiz qoldirmasdan, zudlik bilan shifokorga murojaat qilishga chaqiradi.
O‘z navbatida, doktor Dayana Gallning ta’kidlashicha, ich ketishi koronavirusga chalinganlikning erta alomatlaridan biri hisoblanadi.
COVID-19ga chalinganlikning yana bir belgisi — kon’yunktivit. Bunday bayonot bilan Amerika oftalmologiya akademiyasi xodimlari chiqishgan. Ushbu alomat kam uchraydi — taxminan uch foiz holatda.
«Virus kasallikka chalingan odamning ko‘z yoshi yoki ushbu suyuqlik bo‘lgan buyumlar orqali tarqalishi mumkin», — deya izohladi amerikalik mutaxassislar.
Koronavirusning uchinchi alomati — ong chalkashishi. Londondagi Imperiya kolleji olimlarining ta’kidlashicha, u kognitiv asoratlar sirasiga kirib, tuzalgandan keyin ham bir necha oygacha davom etishi mumkin.
Britaniyalik olimlar o‘z tadqiqotlari doirasida kasallik jiddiy kechishiga qarab miya zararlanishi mumkinligini aniqlashdi.
Yana bir alomati charchoq bo‘lib, Dublindagi Triniti kolleji olimlari COVID-19ga chalingan bemorlarning har ikkinchisida uchrashini va o‘n haftagacha saqlanib qolishini qayd etishgan.
Koronavirus pandemiyasi qariyb butun dunyoni qamrab oldi. Kasallanganlar soni jami 57 million kishiga yaqinlashib qoldi, ulardan 1,3 million nafari vafot etdi. Koronavirus, ayniqsa, AQSH, Hindiston va Braziliyada ko‘proq qayd etilgan.