AstraZeneca’ning koronavirusga qarshi vaksinasi mustaqil komissiya tomonidan baholanadi

^{Foto: Reuters}
AstraZeneca farmatsevtika kompaniyasi ishlab chiqayotgan koronavirusga qarshi vaksina sinaluvchilardan birida keltirib chiqargan nojo‘ya ta’sir mustaqil komissiyasi tomonidan baholanadi. Bu bir haftadan 3 oygacha vaqt olishi mumkin, deb ma’lum qilgan vaksina loyihasida ishtirok etayotgan IRBM italyan kompaniyasi prezidenti Pero di Lorenso.

Avvalroq vaksinaning 3-bosqich sinovlari sinaluvchilardan birida nojo‘ya ta’sir aniqlangandan keyin to‘xtatilgandi.
“Mustaqil ilmiy qo‘mitaning xulosasini kutmoqdamiz. Agar u bir necha hafta ichida olinsa, tadqiqotlar darhol davom ettiriladi”, deb ma’lum qilgan di Lorenso.

Uning aytishicha, ayni vaqtda vaksina bilan 5 ta davlatda 50 ming kishining emlanishi to‘xtatilgan, vaksinaning birinchi dozalari esa yil oxirida olinishi mumkin.

Avvalroq vaksinaning Britaniyadagi sinovlari vaqtida sinaluvchilardan birida tushunarsiz kasallik aniqlangan. Shu sababli vaksinaning ishlab chiqaruvchilari vositaning xavfsiz ekaniga ishonch hosil qilish uchun tanaffus olishgan.