Ozarboyjon butun front chizig‘i bo‘ylab vaziyat keskinlashganini ma’lum qildi

^{Foto: AP Photo / PanPhoto/Armenian Defense Ministry Press Service}
Ozarboyjon mudofaa vazirligi butun front chizig‘i (Qorabog‘) bo‘ylab vaziyat keskinlashganini va arman harbiylari og‘ir jarohatlanganini ma’lum qildi.

"Ozarboyjon va Armaniston chegarasidagi vaziyat keskinligicha qolmoqda. Raqib frontning turli yo‘nalishlarida o‘qotar qurollar qo‘llab o‘t ochishni to‘xtatish rejimini buzmoqda. Bo‘linmalarimiz raqibning front chizig‘idagi faolligini bartaraf etmoqda. Preventiv choralar natijasida Armaniston armiyasining ikki harbiy xizmatchisi og‘ir jarohatlandi", - dedi Ozarboyjon mudofaa vazirligi matbuot xizmati rahbari polkovnik Vagif Dargyaxli.

Ozarboyjon-Armaniston chegarasidagi to‘qnashuvlar 12 iyuldan beri davom etmoqda.

Bokuning ma’lumot berishicha, 12 nafar ozarboyjonlik harbiy halok bo‘lgan. Armaniston to‘rt nafar askari halok bo‘lgani, o‘n nafar harbiy jarohatlanganini ma’lum qildi. To‘qnashuvlarda har ikki tomon bir-birini ayblamoqda.