Koronavirusni 48 soatda o‘ldiradigan dori — qanchalik haqiqat?

^{Foto: AP Photo/Gerald Herbert}
Avstraliyalik olimlar (Melburndagi Monash davlat universiteti) parazitlarga qarshi qo‘llanadigan ivermektin dorisi bilan laboratoriya sharoitida koronavirusni rivojlanishdan to‘xtata olishdi. Bu haqda universitet matbuot xizmati «Antiviral Research» ilmiy jurnalidagi maqolaga havola bilan xabar berdi.

Melburndagi Qirollik shifoxonasida o‘tkazilgan laboratoriya sinovlarida antiparazitik ivermektin dorisi SARS-CoV-2 virusining hujayrada o‘sishini to‘xtatishiga 48 soat ketgan.

^{Doktor Kayli Vagstaff. Foto: «Monash.edu»}
«Hatto hujayralar uchun zaharli bo‘lmagan bitta doza (dori) 48 soat ichida virus RNKsini to‘liq — 99,98 foiz buzishini hamda 24 soat ichida muhitda virus to‘planishini sezilarli kamaytirishini aniqladik», — dedi tadqiqot yetakchi muallifi, Monash universiteti Biotibbiyot maktabi doktori Kayli Vagstaff.

U ta’kidlaydiki, dori hozircha laboratoriya sharoitida samara berdi, endi klinik sinovlardan o‘tishi kerak.
«Hozir butun dunyoda keng qo‘llanilayotgan ivermektin — xavfsiz dori, biroq inson uchun qo‘llash mumkin bo‘lgan doza samara beradimi (koronavirusga qarshi)? Buni aniqlash keyingi qadam bo‘ladi», — ta’kidlaydi doktor Vagstaff.

Ivermektin qanday qilib koronavirusga ta’sir qilishi ham tadqiqotchilarga noma’lum. Balki uning samarasi virusning hujayrasi immunitetiga ta’siridadir — bu ham taxmin.

Universitet matbuot xizmati, garchi laboratoriyada sinov muvaffaqiyatli o‘tgani bilan, ivermektin hozircha odamlarda koronavirus infeksiyasini davolash yoki profilaktikasi uchun qo‘llanilishi mumkin emasligini alohida ta’kidladi. Bu dorining kelgusida qo‘llanilishi klinika oldi va klinik sinovlarda ko‘rsatadigan natijasiga, qanchalik samarali va xavfsizligi aniqlanishiga bog‘liq.

Ma’lumot uchun: Ivermektin inson va hayvonlarni endo va ektoparazitar kasalliklardan davolashda ishlatiladi. Ivermektinni ochganlar 2015 yili fiziologiya va tibbiyot yo‘nalishida Nobel mukofotini qo‘lga kiritishgan.