Dunyoning eng boy odami bir kunda 7 mlrd dollar yo‘qotdi

^{Foto: GeekWire.com}
Amazon asoschisi va rahbari Jyeff Bezos o‘z kompaniyasi hisobotidan keyin bir kun ichida 7 mlrd dollar yo‘qotdi. Bu haqda CNBC telekanali xabar berdi.

24 oktyabrda Amazon 3-chorakda olingan daromadlar haqida hisobot bergan, biroq ko‘rsatkichlar kutilgandan pastroq bo‘lgan. Bu yangiliklar ortida kompaniya aksiyalari 9 foizga arzonlashib ketgan.

Aksiyalar arzonlashgani sababli Bezos 6,9 mlrd dollar yo‘qotgan. Unga hozirda kompaniyasining 57,6 millionta aksiyasi tegishli.

2018 yilda Bezos dunyoning eng boy odamiga aylanib, boyligi 150 mlrd dollardan oshgan. U rafiqasi bilan yanvarda ajrashgandan keyin kapitali kamayganiga qaramay hali ham milliarderlar ro‘yxatida 117 mlrd dollar bilan 1-o‘rinni egallamoqda.