Turkmanistonda 2015 yilning 1 yanvaridan benzin narxi 60 foizga qimmatlashib ketdi. Bungacha Ai-95 benzinning bir litri 62 tanga (22 sent) edi, endilikda bu narx 1 manatga o‘zgardi, Ai-92 benzini esa 94 tangadan sotiladi. Bu haqida “ria.ru”ga asoslanib “kun.uz”
.Turkmaniston ko‘p yillar davomida dunyodagi eng arzon benzin sotiladigan davlat bo‘lib kelgan. Turkmanistonning sobiq prezidenti Saparmurod Niyozov davlatni boshqargan davrda 1 litr benzin narxi eski pul birligi bo‘yicha 400 manat (2 sent) turgan (o‘sha davrda 1 dollar kursi 24 ming manat bo‘lgan). Bir dollarga «Jiguli» mashinasining 40 litrlik benzin bakini to‘liq to‘ldirib, yana qaytimiga 8 ming manat olish mumkin edi.
Turkmanboshining o‘limidan so‘ng, 2007 yildan beri Turkmanistonga prezidentlik qilayotgan Qurbono‘g‘li Burdimuhammedov 2008 yilda mamlakatda turkmanistonlik haydovchilarga tekin benzin limitini kiritdi.
Bunga ko‘ra, har bir avtomobil haydovchisi davlat tomonidan oyiga 120 litr tekin benzin bilan ta’minlangan. Mamlakat rahbari qarori bilan 2014 yilning iyul oyidan Turkmanistonda haydovchilarga tekin benzin berilish davri o‘z nihoyasiga etdi.
Qayd etish kerakki, Turkmanistonda benzin narxi 60 foiz qimmatlashgandan keyin ham bu davlat MDH bo‘yicha eng arzon narxdagi benzin sotiladigan davlat bo‘lib qolmoqda.