Ukrainalik shoumen va aktyor Vladimir Zelenskiy Ukrainadagi prezident poygasida yetakchilik qilmoqda. Bundan “Reyting” ijtimoiy guruhi o‘tkazgan so‘rovnoma ma’lumotlari darak bermoqda. Tadqiqotga ko‘ra, uni so‘ralganlarning 19 foizi qo‘llab-quvvatlamoqda. Reytingning 2-o‘rnini sobiq bosh vazir Yuliya Timoshenko egallamoqda, unga 18,2 foiz respondentlar ovoz berishga tayyor. Amaldagi prezident Pyotr Poroshenkoni 15,1 foiz ishtirokchi qo‘llab-quvvatlagan.
Aholi o‘rtasida eng katta qo‘llab-quvvatlovga ega nomzodlar beshtaligiga “Muxolif platforma – Hayot uchun” partiyasi raislaridan biri Yuriy Boyko (10 foiz) va “Fuqarolik pozitsiyasi” yetakchisi Anatoliy Gritsenko (8,5 foiz) ham kirgan.
Tadqiqotga ko‘ra, 41 yoshli Zelenskiy mamlakat janubi va sharqida katta qo‘llab-quvvatlovga ega, Kiyevda u Poroshenko bilan yetakchilik qilmoqda, Boyko Donbassda, Timoshenko esa mamlakat markazi va shimolida yuqori elektorat ko‘rsatkichlariga ega.
So‘rovnoma 18 yoshdan katta bo‘lgan 6 ming kishi o‘rtasida 16-24 yanvar kunlari olib borilgan.
Ukrainaning tahlil va prognozlashtirish instituti tomonidan 17-25 yanvar kunlari o‘tkazilgan so‘rovnoma esa boshqa natijalarni ko‘rsatgan: nomzodlar o‘rtasida Timoshenko yetakchilik qilmoqda (20 foiz), 2-o‘rinni Zelenskiy (12,6 foiz), 3-o‘rinni Poroshenko (11,9 foiz) egallamoqda.
Ukraina prezidenti saylovlari 31 mart kuni bo‘lib o‘tadi, saylov kampaniyasi esa 2018 yil 31 dekabrda start olgan.