Indoneziya vise-prezidenti Yusuf Kalla (Jusuf Kalla)ning ma’lum qilishia, Malayziyaning AirAsia aviakompaniyasiga tegishli, 28 dekabrga o‘tar kechasi yo‘qolgan samolyot, katta ehtimol bilan, halokatga uchragan. Bu haqda The Bangkok Post xabar bermoqda deb
yozadi Kun.uz.
“Layner halokatga uchragan bo‘lishi ehtimoli bor”, – dedi Kalla maxsus matbuot anjumanida. U yo‘qolgan samolyotni izlash bo‘yicha Indoneziyadagi qidiruv-qutqaruv markaziga ham rahbarlik qilmoqda.
Ayni vaqtda, Indoneziya vise-prezidentining ta’kidlashicha, layner aynan qayerda halokatga uchragani haqida hozircha hech qanday aniq ma’lumot yo‘q.
Avvalroq, qorong‘u tushgani va noqulay ob-havo sharoiti sabab qidiruv ishlari to‘xtatilgani haqida xabar berilgan edi. Qidiruv-qutqaruv ishlari 29 dekabr, dushanba kuni, tong otishi bilan davom ettiriladi.
Bir muddat avval Indoneziya transport vazirligiga samolyot Yava dengizidagi, Indoneziyaga qarashli Belitung orolining sharqi qismiga qo‘ngan bo‘lishi mumkinligi haqida axborot kelib tushgandi. Bu haqda, go‘yoki, samolyot uchib ketgan Surabaya shahridagi inqiroz markazi aniqlagan. Biroq ushbu ma’lumot oxir-oqibat rasman tasdiqlanmadi.
AirAsia aviakompaniyasining Airbus A320 samolyoti QZ8501 reysi bo‘yicha Indoneziyaning Surabaya shahridan Singapurga uchib ketayotgan edi. Samolyot bilan aloqa mahalliy vaqt bilan 7:24da uzilgan. Bungacha samolyot ekipaji, qalin bulut qobig‘idan qochish maqsadida, havo kemasini 9,75 kilometrdan 11,5 kilometr balandlikka ko‘tarish niyatini dispetcherlarga ma’lum qilgan.
Layner bortida 155 nafar yo‘lovchi va ekipajning etti a’zosi bo‘lgan. Yo‘lovchilarning 149 nafari indoneziyalik, uch nafari Janubiy Koreya, bir nafardan Singapur, Malayziya va Buyuk Britaniya fuqarolari bo‘lgan. Layner ekipaji olti nafar Indoneziya fuqarosi va bir fransuzdan iborat edi.