Daniyalik 22 yashar biolog Nils Jensen va uning doʻsti Avstraliyadagi yovvoiy tabiat bagʻrida qurilgan xiyobonga sayohat qilishdi. Va u yerda bahaybat timsoh bilan hayot uchun oʻta xavfli tryuk qilishdi, deb xabar bermoqda Kun.uz.Sayyoh 4,7 metr keladigan timsohni vallabi (kengurular oilasiga kiruvchi uncha katta boʻlmagan jonzot) goʻshti bilan siyladi. Yirtqich goʻshtni paqqos tushirayotgan vaqt, Nils uning ustiga chiqib oʻtirib oldi.
Biologning aytishicha, bu juda qiziqarli, shu bilan birga, juda xavfli ham boʻlgan.
“Men oʻzim uchun yangi boʻlgan turlar bilan tanishishni yaxshi koʻraman. Menga timsoh yoniga yaqinlashish imkoniyati paydo boʻlsa, bu ishni amalga oshirishga majburman. Koʻpchilik meni telba ham deb ataydi”, — dedi u.
Biolog yovvoyi tabiat bagʻrida tushgan surat va videolarini tez-tez ijtimoiy tarmoqlarda eʼlon qilib turadi. Uni hatto “daniyalik Timsoh Dandi” deb ham atashadi.
Avstraliya hukumati sayyohning bu ishini qoraladi. “Videoda koʻrsatilgan xatti-harakat xavfli va shafqatsiz. Biz timsohlarga nisbatan bunday munosabatni oqlamaymiz”, — dedi mamlakat yovvoyi tabiatni muhofaza qilish boʻlimi direktori vazifasini vaqtincha bajaruvchi Treysi Duldig.