Bloomberg agentligi Bloomberg Billionaires Index ma’lumotlari asosida dunyoning eng boy oilalari reytingini tuzdi.Ta’kidlanishicha, dunyoning eng boy 25 oilasining umumiy boyligi 1,1 trln dollardan ko‘proqni tashkil qiladi.
Reytingda 1-o‘rinni Walmart do‘konlari tarmog‘iga egalik qiluvchi Uolton oilasi egallagan. Bu oilaning boyligi 151 mlrd dollarni tashkil qilmoqda.
2-o‘rinni Kox oilasi egallagan. Koch Industries kompaniyasi asoschisi Fred Koxning o‘g‘illari Charlz va Devid umumiy hisobda 99 mlrd dollarga egalik qiladi.
“Mars” kompaniyasi asoschisi Frenk Mars merosxo‘rlari 88 mlrd dollarga ega.
Reytingning 4-o‘rnini dunyoda pivo ishlab chiqaruvchi eng yirik kompaniya hisoblangan Anheuser-Busch InBev’ga egalik qiluvchi uchta oila egallagan. Bu oilalarning umumiy boyligi 54 mlrd dollarga baholangan.
Eng boy oilalar beshtaligini Hermes modalar uyi asoschisi Tyerri Ermesning merosxo‘rlari yakunlamoqda. Ular umumiy hisobda 49 mlrd dollarga egalar.
Yetakchi o‘ntalikdan, shuningdek, Chanel egalari Alen va Jerard Vertxaymer, Reliance Industries sanoat guruhi egalari Ambani oilasi, BMW’ga egalik qiluvchi Kvandt oilasi, Cargill Inc. korporatsiyasiga egalik qiluvchi Kargill oilasi va Boehringer Ingelheim farmatsevtik kompaniyasi egalari joy olgan.
Bloomberg’ning ta’kidlashicha, reytingga merosi kamida bir marta avloddan avloddga o‘tgan oilalar kiritilgan.