Britaniyalik poygachi Mayk Jons o‘tgan dam olish kunlari AQShda o‘tuvchi NASCAR uyushmasi poygasida jiddiy avariyaga uchradi. Jons burilishdan chiqish vaqtida raqibi mashinasi bilan to‘qnashib ketgach, to‘siqqa borib urilgan va yonib ketgan. Shunda pit-stopdan boshlab poygachini kuzatib kelayotgan uning otasi to‘siqdan oshib o‘tib, yonayotgan mashina oldiga birinchi bo‘lib yetib kelgan.
Ota poygachi o‘g‘lini mashina ichidan uning oynasi orqali tortib olib, so‘ngra mashinadan nariga ketish o‘rniga uning ichiga oynasi orqali suqilib, yong‘inni o‘chirish tizimini faollashtirgan. Yordamga yetib kelgan o‘t o‘chiruvchilar olovni batamom o‘chirishgan.
Poygachining otasi Din Jons mahalliy OAVga bergan intervyusida avtomobil yong‘in oqibatida yonib kul bo‘lganini, biroq asosiysi farzandiga shikast yetmaganini aytgan.
“Menda qo‘rqish uchun vaqt yo‘q edi, men o‘g‘limni mashina ichidan chiqarib olishim kerak edi. Men shunchaki o‘z farzandiga yordamga kelgan otaman. Hech kim o‘g‘limni qutqarishimga to‘sqinlik qilolmasdi”, deb aytgan poygachining otasi.
Biroq poyga tashkilotchilari qahramon otani poyga vaqtida trassaga chiqqani uchun jazolashgan.