Hindistonnning shimolida misli ko‘rilmagan sovuq tushishi oqibatida oxirgi bir necha kun ichida 92 kishi sovqotishdan halok bo‘ldi. Mahalliy hukumat rasmiylarining ta’kidlashlaricha, mamlakatning ko‘pgina tumanlarida kuzatilayotgan past harorat oldingi yillardagi ko‘rsatkichlardan yuqori bo‘ldi.
Eng ko‘p qurbonlar shimolda joylashgan, aholi eng zich joylashgan va iqtisodiy qoloq shtatlardan bo‘lgan Uttar-Pradesh shtatiga to‘g‘ri keldi. Odatda bu erda qish mavsumida harorat 4 gradusdan pastga tushmagan, biroq 25 dekabrga o‘tar kechasi harorat ko‘rsatkichi 1,8 ° ga tushib ketdi. Umuman olganda ko‘pgina hududlarda me’yordagidan 4-10° past harorat bo‘lib turibdi.
Ushbu shtat hukumati boshpanasizlar uchun vaqtinchalik uy-joylar tashkil etish, ularni yoqilg‘i va odyollar bilan ta’minlash maqsadida 10,6 mln rupiy (170 ming dollar atrofida) miqdorida mablag‘ ajratdi.
Hindiston uchun bunday past ko‘rsatkichdagi sovuqlar bilan birga mamlakatning shimoliy qismiga quyuq tumanlar ham keldi. Tuman oqibatida avtomobil, temir yo‘l va avia aloqalar izdan chiqdi. Nyu-Dehlining o‘zida 150 dan ziyodroq aviareys va 100 ga yaqin uzoq masofaga yuruvchi poezdlar jo‘nashi kechiktirildi yoki boshqa vatqga ko‘chirildi.
Yo‘llarda ko‘rish darajasining pastligi tufayli har kuni ko‘plab yo‘l-transport hodisalari ro‘y bermoqda, o‘nlab odamlar nest-nobud bo‘lmoqda. 25 dekabr kuni Dehlidan keluvchi shosseda 30 dan ziyodroq avtomobil to‘qnashib ketdi. Natijada besh kishi halok bo‘ldi, 10 dan ziyodroq kishi jarohat oldi.
Ob-havo mutaxassislari bergan ma’lumotlarga ko‘ra, yaqin kunlarda ob-havoning yaxshilanishi kutilmayapti.
Manba:
Kun.uz