Qochoqlarni Gresiyaga olib o‘tayotgan yana bir qayiq Turkiya qirg‘og‘i yaqinida cho‘kishi oqibatida to‘rt nafar bola halok bo‘ldi. Bu haqda AFP agentligi bergan ma’lumotlarga asoslanib, «TASS» xabar bermoqda.
Ma’lumotlarga ko‘ra, qurbonlar afg‘onistonlik bo‘lgan. Halok bo‘lganlardan tashqari qayiqda suriyalik va afg‘onistonliklardan iborat 51 kishi bo‘lgan va ular qutqarilgan.
Avvalroq Turkiya sohili yaqinida yana bir qayiqning to‘ntarilishi oqibatida ikki nafar bolaning halok bo‘lgani, 15 kishi qutqarilib, Bodrum shahrining polisiya bo‘linmasiga yuborilgani xabar qilingandi.
Xalqaro Migrasiya Tashkiloti (XMT) keltirgan ma’lumotlarga ko‘ra, 2015 yilning boshidan O‘rtaer dengizi orqali Evropaga 704 mingdan ziyod muhojir kelib tushgan. Eng ko‘p muhojirlar – 560 ming kishini Gresiya qabul qilgan bo‘lib, Italiyaga 139,5 ming kishi qochib kelgan. XMTga ko‘ra, 2015 yilning boshidan hozirga qadar Evropaga etib olish maqsadida harakat qilgan 3,2 ming kishi dengizda halok bo‘lgan.