Chingizxonning etnik mansubligi haligacha olimlarni qiziqtirib keladi, deya xabar bermoqda «Nur.kz». Yosh tadqiqotchilar buyuk hukmdor qozoq bo‘lganidan darak beruvchi qator dalillarni topdi. Bunga ko‘pchilik xorijiy tarixchilar ham qo‘shiladi.
Qozog‘istondagi ilmiy tanlovda eng yaxshi tadqiqot ishi deb tan olingan ma’ruzasida yosh olim Jarken Bodeshke qadimgi hukmdor qozoq bo‘lganini isbotlovchi qiziqarli faktlarni keltirib o‘tdi.
Bundan tashqari, ukrainalik tarixchi Vladimir Belinskiy ham Chingizxonni mo‘g‘ul emas, qozoq deb atash uchun dalillar etarli deb hisoblaydi: uning otasi turklarning qiyotlar qabilasi sardori bo‘lgan, ular keyinchalik naymanlar, merkitlar va keraylar bilan birgalikda Chingizxon imperiyasining asosiga aylangan. Shuningdek, mo‘g‘ul hukmdorlari xon emas, kontaychi maqomiga ega bo‘lgan. Chingizxonning haqiqiy ismi — Temuchin ham turk tilidan kelib chiqqan.
«Chingizxon» jurnali ta’sischisi Amre Arin so‘zlariga ko‘ra, tez orada Chingizxonning qozoq bo‘lgani haqidagi fakt bo‘yicha aniq isbotlar bazasini yig‘ish uchun Qozog‘iston, Rossiya va O‘zbekiston olimlaridan iborat ekspedisiya tashkil qilinadi.
Manba: Daryo.uz