Moldova polisiyasi bosh nozirligi mamlakat hukumati zo‘ravonlik bilan egallab olinishi haqida ogohlantirilganini xabar qildi, deb yozadi «Evropeyskaya pravda».
Belsi shahrida sakkiz kishi hibsga olingan. Ular o‘z aybini tan olib, tergov bilan hamkorlik qilishga rozi bo‘lgan. Ular guruhning yana boshqa a’zolari ismlarini ham oshkor etgan, ular ham qo‘lga olingan. Hibsga tushganlar soni ayni paytda jami 13 kishini tashkil etmoqda.
Jinoiy guruh Belsidagi harbiy garnizonga hujum qilmoqchi bo‘lgan. Shuningdek, ular shahardagi turmaga hujum uyushtirib, u erdagi mahbuslar hisobiga o‘z tarkibini ko‘paytirmoqchi bo‘lgan.
Tezkor bo‘lim harbiylari guruh kuch ishlatish yo‘li bilan mamlakat hukumatini egallab olish niyatida bo‘lganini aniqladi. Gumonlanuvchilarning uy, avtomobil va omborlarida o‘tkazilgan tintuv chog‘ida qurol-yarog‘, harbiy forma, ko‘zni yoshlantiruvchi gaz, katta hajmdagi mablag‘ topilgan. Shuningdek, ularga tegishli Kishinyov va Belsi xaritalarida beshta ob’ekt belgilab qo‘yilgan bo‘lgan.