Rossiyaning Turkiya tomonidan urib tushirilgan Su-24 bombardimonchi samolyotining ikkinchi uchuvchisi suriyalik harbiy xizmatchilar tomonidan evakuasiya qilingan, deya xabar bermoqda «Gazeta.ru» Al Mayadeen nashriga tayanib.
Ta’kidlanishicha, olti soat davom etgan qidiruvdan so‘ng uchuvchi bilan aloqa tiklangan. Suriya maxsus topshiriqli bo‘linmasi ikki soat davomida uchuvchini jangarilar fronti ortidan olib chiqqan. Ayni paytda u Xmeymimdagi Rossiya aviabazasida xavfdan xoli vaziyatdadir.
Ushbu ma’lumot rasman tasdiqlangani yo‘q.
Eslatib o‘tamiz, 24 noyabr kuni Rossiya harbiy samolyoti Turkiyaning F-16 qiruvchisi tomonidan urib tushirilgandi. Rossiya mudofaa vazirligi Su-24 samolyotining bir nafar uchuvchisi halok bo‘lganini rasman tasdiqladi.
Manba: Daryo.uz