Rossiya Ukrainaga gaz etkazib berishni to‘xtatadi. Bu haqda «Gazprom» rahbari Aleksey Millerga tayanib, «Gazeta.ru» xabar bermoqda.
«Bugun (25 noyabr) ertalab 10:00 holatiga ko‘ra, Ukraina ‘Naftogaz’i Rossiya gazining oldindan to‘langan hajmini batamom olib bo‘ldi. Yangi to‘lov amalga oshirilgani yo‘q. ‘Naftogaz’ gaz etkazib berish haqida talabnoma taqdim etgani yo‘q. Shu tariqa, Ukraina kompaniyasidan yangi to‘lovlar tushmagunicha, gaz etkazib berish to‘xtatiladi», — dedi «Gazprom» rahbari.
Miller so‘zlariga ko‘ra, Rossiya gazini sotib olishdan bosh tortish Rossiya gazini Evropaga Ukraina yo‘lagi orqali tranzit qilish uchun jiddiy risklarni yuzaga keltiradi, chunki Ukraina er osti omborlaridan gazni olib qo‘yadi.
Eslatib o‘tamiz, avvalroq Rossiya Qrimning energetik qamal qilinishiga javoban, 24 noyabr, seshanba kundan Ukrainaga ko‘mir etkazib berishni to‘xtatgani xabar berilgan edi.
Manba: Daryo.uz