Qirg‘iziston sobiq prezidenti Qurmanbek Bakievga, shuningdek, uning ukasi Jonibek Bakievga nisbatan yangi ayblovlar e’lon qilindi, deya xabar bermoqda «TASS» Qirg‘iziston bosh prokuraturasiga tayanib.
Sobiq prezident, uning ukasi va yuqori mansabli sobiq amaldorlar guruhi 2008 yilda Bishkek tashqarisidagi er maydonlarini bir kategoriyadan boshqasiga noqonuniy ravishda o‘tkazganlikda ayblanmoqda.
Shu tufayli sobiq prezident va uning ukasiga «Korrupsiyada sheriklik qilish», qolganlarga «Xizmat lavozimini suiiste’mol qilish» ayblovlari qo‘yildi. Jinoyat ishi Bishkek shahar Oktyabr tumani sudiga ko‘rib chiqish uchun yo‘naltirildi.
Eslatib o‘tamiz, Qirg‘iziston sobiq prezidenti Qurmanbek Bakiev 2010 yil 7 apreldagi ommaviy qirg‘inni uyushtirishga aloqador deb topilib, mol-mulki musodara qilingan holda umrbod qamoq jazosiga sirtdan hukm qilingan edi.
Avvalroq Qurmanbek Bakiev Buyuk Britaniya fuqarosi Shon Deyliga suiqasd tashkil qilishda ayblanib 25 yilga ozodlikdan mahrum qilingan edi.
Bakiev 2005–2010 yillarda prezidentlik qilgan. 2010 yil aprel voqealarida qo‘zg‘olonchilar va hukumat kuchlari o‘rtasidagi to‘qnashuvlarda 80 dan ortiq kishi halok bo‘lgan, yana 300 kishi yaralangan. To‘ntarishdan keyin prezident Aleksandr Lukashenko taklifi bilan Belorussiyaga ketgan. Qirg‘iziston hukumati tepasiga kelgan raqiblari Bakievni topshirishni talab etishgan, ammo Belorussiya uni Qirg‘izistonga topshirishdan bosh tortgan.