Amerikaning Vashington shtatiga 19 noyabr, payshanbaga o‘tar kechasi kuchli shamol yopirildi. Oxirgi ma’lumotlarga qaraganda uch kishi qurbon bo‘ldi, deb xabar beradi «RIA Novosti».
Monro shahri yaqinida avtomobil ustiga daraxtning qulashi oqibatida uning haydovchisi qurbon bo‘ldi. Yana ikki nafar ayol Spokan shahri yaqinida qulagan daraxtlar ostida qolib, halok bo‘ldi.
Shtatning 185 mingga yaqin uyi elektrsiz qoldi. Noqulay ob-havo tufayli shtat gubernatori Jey Insli favqulodda vaziyat e’lon qildi.
Vashington sharqidagi Spokan shahri okrugida kuchli shamol natijasida maktablar yopildi. Mahalliy energetika kompaniyasining ma’lum qilishicha, elektr ta’minotini qayta tiklash uchun uch kundan besh kungacha vaqt talab etilishi mumkin.