AQSh Davlat departamenti IShIDning asosiy etakchilaridan biri Abu Muhammad al-Shimoliy nomi bilan mashhur Tirad al-Jarba haqidagi ma’lumot uchun besh million dollar mukofot tayinladi. Bu haqda «Vedomosti» boshqarma matbuot xizmati ma’lumotiga tayanib xabar beradi.
U IShIDda chet ellik jangarilarni Turkiya—Suriya chegarasidan o‘tkazish bilan shug‘ullanuvchi immigrasiya va logistika masalalari bo‘yicha komissiyani boshqaradi. Shuningdek, kontrabanda faoliyatini hamda Evropa, Shimoliy Afrika va Arabiston yarimorolidan Suriya va Iroqqa moliyaviy o‘tkazmalarni nazorat qiladi.
29 sentyabrda al-Shimoliy xalqaro terrorchilar ro‘yxatiga kiritilgan va unga nisbatan BMT Xavfsizlik kengashi qarori bilan sanksiyalar joriy etilgan. Uning AQShdagi moliyaviy aktivlari yopib qo‘yilgan.
Manba: Daryo.uz