AQShda “Birlashgan numizmatlar” an’anaviy anjumanida “Sochlari yoyilgan Stella” nomi bilan ma’lum bo‘lgan, 1879 yilda zarb qilingan oltin tanga 750 ming dollarga sotildi. Bu haqda Associated Press axborot agentligi xabar berdi deb yozadi Kun nashri. “Bunday tangalar tajriba sifatida zarb qilingan. AQSh hukumati bu tangalarni ular xalqaro to‘lov vositasiga aylanishini mo‘ljallab chiqargan. Biroq keyin bu tangalar chiqarilishi to‘xtatilgan”, deb izoh berdi Heritage Auction auksion uyi mutaxassisi Mark Borkard.
Ta’kidlanishicha, dunyoda bunday tangalardan bor-yo‘g‘i 20 tacha qolgan. Tanga 6 gramm oltin, 0,3 gramm kumush va 0,7 gramm misdan iborat.
Shuningdek, auksionda Filadelfiya zarbxonasi tomondan chiqarilgan ilk mis tangalardan biri 300 ming dollarga sotildi. Bu tanga 1793 yilda zarb qilingan. Tanga bir sent qiymatda bo‘lib, unda sochlari yoyilgan ayol tasviri va “Ozodlik. 1793” yozuvi bor.
Ta’kidlanishicha, ushbu numizmatik auksion orqali 24,9 mln dollar mablag‘ qo‘lga kiritilgan.