2016 yilning 31 dekabridan 2017 yilning 1 yanvariga o‘tar kechasi Turkiyaning Istanbul shahrida joylashgan Reina tungi klubida terakt amalga oshirildi. Bu haqda “Haber7.com” nashriga asoslanib “Qalampir.uz” sayti xabar bermoqda.Tungi klubda Yangi yil bayrami nishonlanayotgan vaqtda Santa klaus libosidagi qurollangan shaxs klubga kirib, odamlarga qarata o‘q uza boshlagan. Istanbul gubernatori Vasip Shaxinning so‘zlariga qaraganda, terrorchi bir o‘zi bo‘lgan, guvohlar esa ular ko‘pchilik bo‘lganini aytmoqda.
Turkiya Respublikasi Ichki ishlar vaziri Sulaymon Soyluning ma’lum qilishicha, terakt natijasida 39 kishi halok bo‘lgan, 69 kishi yaralangan. Qurbonlardan 16 nafari xorijlik, 5 tasi turk ekani aytilmoqda.
Rasmiy ma’lumotlarga qaraganda, teraktni amalga oshirgan shaxs zudlik bilan klubni tark etib, avtomobilda qochgan. “Terrorchini qidirish ishlari davom etmoqda. Umid qilamanki, u tez orada qo‘lga olinadi”, deydi Ichki ishlar vaziri Sulaymon Soylu.