25 avgust kuni Qozog‘istonning Olma-Ota shahridagi Al-Farobiy ko‘chasida haydovchilar tuyaqushning ustiga minib olgan odam birin-ketin yo‘ldagi mashinalarni quvib o‘tib ketayotganiga guvoh bo‘lishdi. Bu haqda “Nur.kz”ga asoslanib “Qalampir.uz” xabar yozmoqda. Mazkur ajoyib voqea videoga olindi va YouTube portaliga joylashtirildi.
Internet foydalanuvchilari erkakning yo‘ldagi tirbandliklardan qochish va qimmat yoqilg‘iga pul sarflamaslik uchun tuyaqush minishga qaror qilgan bo‘lishi mumkinligini aytishmoqda.
Bundan tashqari, ba’zi bir foydalanuvchilar bu tassirlar videomontaj mahsuli ekanini ham taxmin qilishmoqda.
Ma’lumot o‘rnida, tuyaqushlar soatiga 60-70 kilometr tezlikkacha harakatlana oladi. Ularning bir qadami 3.5-4 metrgacha etishi mumkin. Tuyaqushning bir oylik polaponi ham soatiga 50 kilometr tezlikda harakatlana oladi.