Rossiya prezidenti Vladimir Putin Ukraina Mudofaa vazirligining razvedka xizmati tomonidan Qrimda terakt sodir etishga urinish bo‘lgani haqida tarqatilgan xabarga munosabatini bildirdi. Bu haqda «Kun» nashri xabar qildi.
U Ukraina tomoni harakatlarini «o‘ta xavfli o‘yin» deb atagan va Rossiya o‘z hududida xavfsizlikni ta’minlash uchun zarur choralar ko‘rishini ta’kidlagan.
Putin shuningdek, Ukraina siyosiy vaziyatni tinch yo‘l bilan barqarorlashtirish yo‘llarini qidirish o‘rniga terrordan foydalanishga o‘tgani haqida gapirgan.
Bundan oldinroq Rossiya Federal xavfsizlik xizmati Qrim Respublikasi hududida Ukraina mudofaa vazirligining Razvedka bosh boshqarmasi tomonidan tayyorlangan terrorchilik aktlarining oldi olinganini ma’lum qilgani haqida xabar berilgandi.
7 avgustga o‘tar kechasi yuz bergan to‘qnashuvda FXXning bir xodimi, 8 avgustga o‘tar kechasi bo‘lib o‘tgan otishma davomida rossiyalik bir harbiy halok bo‘lgan.
Ko‘p o‘tmasdan Ukraina razvedkasi vakili Ukraina mudofaa vazirligiga qarashli maxsus bo‘linmalar diversion guruhlari Qrimga bostirib kirgani haqidagi xabarlarni inkor etdi.