15 iyul kuni Turkiyada bo‘lgan davlat to‘ntarishiga harakatda hukumat Fathulloh Gulenning qo‘li borligini ta’kidlab kelmoqda. Turkiyaning sobiq diniy etakchilaridan biri, 1999-yildan beri AQShda yashab kelayotgan muxolif siyosatchi Fathulloh Gulen mamlakat prezidenti Rajab Toyib Erdo‘g‘anning ayblovlarini inkor qilmoqda.Bugun, 23 iyul kuni Turkiya hukumati Gulen harakatiga aloqador bo‘lgan 35ta tibbiyot instituti, 1043ta xususiy maktab, 1229ta jamg‘arma, 19ta uyushma, 15ta xususiy universitetni yopdi. Bu haqda “Dailysabah”ga asoslanib “Qalampir.uz” xabar bermoqda.
Bu Turkiyada favqulodda holat tartibi e’lon qilingandan buyon birinchi qaror hisoblanadi. Mamlakatda 21 iyul kuni favqulodda holat tartibi o‘rnatilgan edi.
Turkiya hukumati mamlakatdagi 21 738 nafar o‘qituvchining Gulen harakatiga aloqador deb gumon qilmoqda.
Eslatib o‘tamiz, o‘tgan hafta Turkiyadagi bir guruh harbiylar ishtirokida davlat to‘ntarishi amalga oshirilgan edi. Ko‘p o‘tmay isyon bostirildi. Unda 200ga yaqin odam halok bo‘ldi. 1400 nafardan ortiq odam esa jarohatlandi. Davlat to‘ntarishiga aloqadorlikda gumon qilingan 10 mingdan ortiq kishi hibsga olindi.