Quyosh batareyalarida harakatlanuvchi Solar Impulse 2 samolyoti Gavayyaga majburiy qo‘nishni amalga oshirgandan to‘qqiz oy o‘tib dunyo bo‘ylab parvozini qaytadan boshladi, deya RIA Novosti ma’lumotiga asoslanib "Gazeta" nashri
xabar beradi.
Faqatgina quyosh energiyasidan foydalanib parvoz qiladigan Solar Impulse 2 dunyo bo‘ylab sayohatga 2015 yilning 9 martida Abu-Dabidan yo‘lga chiqqan edi. U shu vaqtga qadar Ummon (Maskat), Hindiston (Varanasi), Myanma (Mandalay), Xitoy (Chunsin va Nankin) va Yaponiya (Nagoya)da bo‘ldi.
3 iyul kuni samolyot 120 soatdan ziyod vaqt mobaynida to‘xtovsiz parvoz qilgan holda havoda to‘xtalishlarsiz eng uzoq muddat bo‘lish rekordini o‘rnatib, Gavayya oroliga etib keldi. Ayni shu vaqtda batareyalar qizib ketib, ishdan chiqdi.
Ta’mirlash vaqtida samolyot uchuvchilari Andre Borshberg va Bertran Pikar Evropaga qaytib, loyihani moliyalashtirish uchun manba qidirdi. AQShga uchib boradigan havo kemasi Atlantika okeanini kesib o‘tadi va Janubiy Evropa yoki Shimoliy Afrikada to‘xtab, Abu-Dabiga qaytadi.
Solar Impulse 2 2014 yil iyunida muvaffaqiyatli tarzda sinovdan o‘tdi. Havo kemasining jami og‘irligi 2,3 tonnani tashkil etadi, samolyot qanotlarining uzunligi — 72 m bo‘lib, unga uchish uskunasining elektromotorlarini energiya bilan ta’minlashi uchun 17,2 ming dona quyosh batareyasi o‘rnatilgan. Samolyotning eng yuqori tezligi 140 km/soatni tashkil etadi.