Ekvatorial Gvineyaning prezidenti Teodor Obianga Ngema o‘g‘li va vitse-prezidenti Teodorin Obianga Ngemadan musodara qilingan 25 ta hashamatli avtomobil Shveysariyada sotuvga qo‘yildi. Bu haqda Kun.uz xabar berdi. Auksionni olib boradigan Bonhams auksion uyining baholashicha, superkarlarning umumiy qiymati 18,7 mln dollarni tashkil qiladi.
Jenevadagi golf-klubda namoyishga qo‘yilgan avtomobillar orasida 7 ta Ferrari, 3 ta Lamborghini, 5 ta Bentley, Maserati va McLaren avtomobili bor.
Ular orasidagi eng mashhur avtomobil Lamborghini Veneno Roadster bo‘lib, undan bor-yo‘g‘i 9 dona ishlab chiqarilgan. Bu mashina uchun 5 mln dollar olish ko‘zlanmoqda. Mashina kapotida Ngemaning ismi-sharifi bosh harflari tushirilgan.
Yana bir yirik lot Ferrari’ning cheklangan miqdorda chiqarilgan LaFerrari poyga superkari hisoblanadi.
Avtomobillar Shveysariya sudi tomonidan 2016 yilda Ngemaga qarshi ish ochilgandan keyin musodara qilingan. 2019 yil fevralda Shveysariya prokuraturasi avtomobillar musodara qilinishi evaziga Ekvatorial Gvineya prezidentining o‘g‘liga qo‘yilgan ayblovlarni bekor qilishini aytgan.