Fotojosuslar BMW 7-Series’ning yangi flagman sedanini suratga olishga muvaffaq bo‘lishdi. autoblog.nl saytida chop etilgan bu suratlardan yangi modelning kuzovi “ettinchi” seriyadagi avvalgi model uslubidagi sipo dizaynga ega bo‘lishi hamda i8 superkarida ilk bor ishlatilgan lazerli chiroqlar bilan jihozlanishi ko‘rinib turibdi, deb
Kun.uz.Dastavval 2015 yil kuzida Frankfurtda bo‘lib o‘tadigan avtosalonda BMW’ning yangi flagman mashinasi ilk taqdimoti o‘tkazilishi rejalashtirilgan edi. Chop etilgan suratlar “ettinchi”ning yangi modeli allaqachon tayyorligi va 2015 yil yanvar oyining boshlarida Detroytda bo‘lib o‘tadigan ko‘rgazmada namoyish etilishi mumkinligidan darak beradi.
Avvalroq xabar berilganidek, BMW 7-Series yangi avlod sedani yangi modernizasiyalashtirilgan platformada qurilgan bo‘lib, kuzovning optimallashtirilishi va qismlarining yengil qotishmalardan tayyorlanishi hisobiga o‘rtacha hisobda 150 kilogrammga yengilroq bo‘ladi. “Ettinchi” an’anaviy tarzda ikki ko‘rinishda: standart (G11 indeksi) hamda 13 santimetrga uzaytirilgan g‘ildirak bazasida (G11 indeksi) taklif etiladi.
Yangi modelning kuch qurilmalari olti va sakkiz silindrli benzinli va dizelli dvigatellarni o‘z ichiga oladi, qimmatbaho variantlari esa V12 dvigateli bilan jihozlanadi. Bundan tashqari, keyinroq bu modelning 275 ot kuchidan ziyodroq quvvatga ega bo‘lgan “turboto‘rtlik”ka ega bo‘lgan bazaviy versiyasi hamda bir yoki ikki gibridli modifikasiyalari paydo bo‘lishi kutilmoqda.
BMW 7-Series’ning yangi modelida lazerli chiroqlardan tashqari, yangi interfeysga ega bo‘lgan va yanada quvvatliroq iDrive yangi avlod multimedia tizimi ham ilk bor ishlatiladi. Haydovchilar uchun bavariyalik avtomobilsozlar an’anaviy asboblar paneli o‘rniga to‘liqligicha raqamlashtirilgan panelni hamda to‘ldirilgan reallik bilan jihozlangan yangi proeksion displeyni taklif qilishmoqda.
Foto: motor.ru / kun.uz