“Mening fikrim” jamoaviy murojaatlar portalida shaxsiy yengil avtotransport vositalarini texnik ko‘rikdan o‘tkazish tartibiga o‘zgartish kiritish to‘g‘risida petitsiya paydo bo‘ldi.Ma’lumki, shaxsiy avtomashinalar, uning egasi doimiy ro‘yxatdan o‘tgan joydagi ichki ishlar organlarining tegishli bo‘limlari (DYHXX) tomonidan texnik ko‘rikdan o‘tkaziladi. Ammo bu holat ayrim noqulayliklarni keltirib chiqarmoqda, deyiladi murojaatda.
Jumladan, ba’zi fuqarolar kasb taqozosi yoki ish faoliyati sabab, mamlakatning turli hududlarida oylab, ba’zan yillab vaqtinchalik bo‘lishiga to‘g‘ri keladi. Bu vaqtda ushbu fuqarolar shaxsiy avtoulovlarini navbatdagi texnik ko‘rikdan o‘tkazish uchun doimiy yashash joyiga borib kelishi zarur. Bu o‘z navbatida, birinchidan, ortiqcha sarson bo‘lish, ikkinchidan, doimiy yashash joyiga borib kelishi uchun xizmat yoki ish faoliyatidan vaqtincha ajralishiga olib keladi. Andijon yoki Toshkentdan Nukus yoki Xorazmga borib avtoulovni texnik ko‘rikdan o‘tkazib kelish uchun kamida 3 kun vaqt ketadi.
“Yuqoridagilardan kelib chiqib, O‘zbekiston fuqarolarining avtotransport vositalarini texnik ko‘rikdan o‘tkazish, fuqaroning doimiy ro‘yxatdan o‘tgan joyidan qat’i nazar, yurtimizning barcha hududlarida amalga oshirishga ruxsat berilishini taklif qilaman”, - deb yozadi petitsiya muallifi.