Porsche 60 mingga yaqin avtomobilni chaqirib oladi

Germaniyaning Porsche avtomobilsozlik kompaniyasi jahon bo‘ylab qariyb 60 ming dona Macan S va Macan Turbo yo‘ltanlamas avtomobillarini chaqirib olishga qaror qildi. Bu haqda «Korrespondent.net» ga asoslanib «Daryo.uz» xabar bermoqda.

Kompaniya rasmiy vakillarining ma’lum qilishicha, mazkur qaror avtomobillarning yonilg‘i uzatish tizimi germetikasida nosozliklar borligi aniqlanganidan so‘ng qabul qilingan. Germaniyaning o‘zida 3641 avtomobil ta’mirdan chiqariladi.

Ma’lumotlarga ko‘ra, aniqlangan nosozlik mijozlar hayotiga bevosita xavf solmaydi, biroq u yonilg‘ining to‘kilishiga sabab bo‘lishi mumkin. Qayd etish joiz, Porsche o‘z tarixida ilk bor bir necha o‘n ming avtomobilni ta’mir uchun chaqirib olmoqda.

Bosh qarorgohi Shtutgartda joylashgan kompaniya 2014 yili jahon bo‘ylab 189849 dona avtomobil sotdi, 2015 yilda Porsche kamida 200 ming dona avtomobil sotishni rejalashtirgan.