“AvtoVAZ” kompaniyasi Lada Vesta avtomobilini seriyali tarzda ishlab chiqara boshladi. Modelni yig‘ish “IjAvto” korxonasida yo‘lga qo‘yildi.Sedan Volga avtozavodining yaratgan yangi platformasida quriladi. Biroq bir qator butlovchi qismlar, jumladan rul boshqaruvi, torsion balka va tormoz Renault-Nissan alyansi avtomobillaridan olinadi.
Dastlabki ma’lumotlarga ko‘ra, yangi avtomobil dastlab mexanik yoki “robot” uzatmalar qutisi bilan juftlikda ishlaydigan 1,6 litrli 16 klapanli, 106 ot kuchiga ega motor bilan taklif qilinadi. So‘ngra avtomobilning shunday hajmdagi, biroq 114 ot kuchiga ega dvigatelli versiyasi taklif qilinadi.
“Vesta” avtomobili “Klassik”, “Komfort” va “Lyuks” modifikasiyalarida taklif qilinadi. Avtomobilning standart jihozlariga ikkita xavfsizlik yostig‘i, ABS, barqarorlashtirish tizimi, rulning elektr kuchaytirgichi, tepalikka chiqishda yordam beruvchi tizim, kondisioner, audiotayyorgarlik, favqulodda vaziyatlarda shoshilinch ogohlantirish “ERA-GLONASS” funksiyasi kiradi.
“Komfort” varianti old o‘rindiqlarni isitish funksiyasi, elektr privodli tashqi oynalar va isitish hamda Bluetooth va 4,3 dyuymli ekranga ega audiotizim bilan taklif qilinadi. Sedanning top-versiyasi old oynani isitish tizimi, yorug‘lik va yomg‘ir datchiklari, orqa elektr oyna ko‘targichlar va 16 dyuymli quyma g‘ildirak disklari bilan jihozlanadi.
“Avtosreda” nashrining ma’lumotlariga ko‘ra, Lada Vesta‘ning narxi 495-600 ming rubl atrofida bo‘ladi. Rasmiy narxlar avtomobilning 25 noyabrda savdoga chiqarilishidan avval e’lon qilinadi.