Bir hafta muqaddam Consumer Reports nashri eng ishonchli avtomobil markasini aniqlaganligini yozgan edik. Germaniya texnik nazorat Uyushmasi 9 mln texnik ko‘rik natijalariga asoslanib avtomobillarning ishonchlilik darajasiga ko‘ra reytingini tuzdi.Consumer Reports avtomobil markalarining ishonchlilik reytingini tuzgan bo‘lsa, nemis uyushmasi muayyan avtorusum asosida tuzdi. Har bir mashinaning olgan bahosi uning texnik nuqsonlariga bog‘liq.
Shunday qilib Mercedes-Benz GLK krossoveri va Porsche 911 sportcha rusumlar oilasi eng ishonchli avtomobillardir deb topildi. Avtomobil egalarining atigi 2,1 foizi undan shikoyat qilgan. To‘g‘ri, xulosa uch yil avval chiqarilgan Mercedes-Benz GLK va Porsche 911ga tegishlidir. Etti yillik avtomobillar orasida Mazda 2 xetchbeki eng ishonchlisi bo‘lib chiqdi. 6,8 foiz “Mazda”da kamchilik aniqlandi.
Germaniyada mashinaga eng yaxshi xizmat ko‘rsatuvchi hududlar Saksoniya, Bavariya va Baden-Vyurtenberg ekanligi aniqlandi.
Qizig‘i shundaki, Focus Online nashri Saksoniya hududidagi avtomobillarning texnik jihatdan sozligini quyidagicha izohlaydi. Saksoniya GDR tarkibida paytida Wartburg va Trabant yengil mashinalari egalari texnikani ko‘pincha o‘zlari ta’mirlardi. Shu bois saksoniyaliklarda mashina kapotini tez-tez ochib, mayda-chuyda kamchiliklarini mustaqil ta’mirlash odati saqlanib qolgan.