Kelasi yilda Amerika harbiylari hozircha yagona nusxada yasalgan Chevrolet Colorado ZH2 vodorodli pikapini sinab ko‘radi. Bu haqda "Carzone.uz" xabar bermoqda.Mashina Chevrolet Colorado pikapining tubdan qayta ishlangan nusxasidir. Qayta ishlash jarayonida mashinaning motori o‘zgargan, g‘ildiraklar bazasi kengaygan, kuzovi mustahkamlashgan.
Avtomobil harbiylarga atalgani uchunmi, texnik tafsiloti aytilmadi. Biroq General Motors buyurtmachilar talabiga muvofiq o‘tuvchanligi yuqori, zarurat tug‘ilganda avtonom boshqariladigan, o‘zini sezdirmaydigan avtomobil tayyorlaganligi ma’lum.
Konseptual pikap g‘ildiraklariga 37 dyuymli yo‘ltanlamas shina kiygazilgan va sportcha o‘rindiqlar o‘rnatilgan. TARDEC (Tank Automotive Research, Development & Engineering) tadqiqot markazi direktori Pol Rojers “Yonilg‘i elementiga yuradigan avtomobillar armiyada qiziqish uyg‘otadi, chunki ular yangi imkoniyatlarni yaratadi. Bunday mashinaning aylantirish momenti yuqoriroq, tejamkor va shovqinsiz yuradi”, deydi.
Ammo vodorodli avtomobilning narxi qimmat bo‘lishi tayin. Shuning uchun Chevrolet Colorado ZH2 sinovdan muvaffaqiyatli o‘tganda ham AQShlik harbiylar uchun yoppasiga ishlab chiqariladi, deb aytish qiyin. Vodorodmobil maxsus xizmatlarni ado etuvchi bo‘linmalarga qo‘l keladi, shuning uchun ularga ozroq partiyada ishlab chiqarilishi mumkin.
