Bugun, 27 may kuni Toshkent shahridagi Driver village salonida GM Uzbekistan milliy avto ishlab chiqaruvchisining yangi avlod Chevrolet Nexia avtomobili taqdimoti bo‘lib o‘tdi. Soat 19:00da boshlangan taqdimotda O‘zbekiston avtomobil sanoati doirasidagi shaxslar hamda xorijlik hamkorlar ishtirok etishdi.
O‘zbekistonda 1996 yildan buyon ishlab chiqarib kelinayotgan birinchi va ikkinchi avlod Nexia (N150) modellarining davomchisi yangi avlod Chevrolet Nexia avtomobilini 2016 yilning ikkinchi yarmidan Andijon viloyatidagi Asaka zavodida seriyali ravishda ishlab chiqarishni yo‘lga qo‘yish va xorij bozoriga, xususan MDH, Yaqin Sharq va Afrika mamlakatlariga eksport qilish rejalashtirilgan,
deyiladi "Kun" nashrida.
Yangi Nexia T250 bazasida ishlab chiqarilib, imbolayzer, ABS, Isofix tizimi (bolalar o‘rindiqlari uchun mustahkamlagichlar), immobilayzer, DRL (kunduzgi old chiroqlar) va haydovchi xavfsizlik yostig‘i bilan ta’minlangan. Eng yuqori pozisiyada esa old yo‘lovchi uchun ham xavfsizlik yostiqchasi mavjud.
Avtomobil GM Powertrain-Uzbekistan tomonidan ishlab chiqarilgan sig‘imi 1,5 litrga teng, 16 klapanli 109 ot kuchiga ega benzinli S-TEC III dvigateli va besh bosqichli mexanik yoki olti bosqichli avtomat tezlik uzatmalar qutisi yordamida harakatga keladi.
Model 11 rang ishlab chiqariladi. Rul chambaragi Lacetti’niki bilan bir xil.
Audiotizimda Bluetooth, AUX, handsfree imkoniyatlari mavjud. USB porti to‘xtash tormoz dastasi yonida qulay qilib joylashtirilgan.