Aholining dori vositalariga bo‘lgan ehtiyojidan mo‘may daromad orttirib qolish maqsadida foydalanishga urinayotgan shaxslarning noqonuniy harakatlariga bojxonachilar tomonidan o‘z vaqtida chek qo‘yildi.Jumladan, Toshkent viloyati bojxona boshqarmasining Kontrabandaga qarshi kurashish va bojxona auditi bo‘limi xodimlari tomonidan poytaxtimizning Yashnobod tumanida tezkor tadbir o‘tkazildi.
Tezkor tadbirda avvaldan kuzatuvga olingan fuqarolardan biri xorijda ishlab chiqarilgan, ammo sifatini va bojxona rasmiylashtiruvini tasdiqlovchi hujjatlari bo‘lmagan 1304 dona “Akvavit-D3” dori vositasini 3200 AQSH dollariga sotayotgan vaqtida to‘xtatib qolindi.
Dorixonadan tashqari hududda noqonuniy realizatsiyadan to‘xtatib qolingan mazkur dori vositalarining umumiy qiymati salkam 56 mln. so‘mni tashkil qilmoqda. Hozirda mazkur holat yuzasidan surishtiruv harakatlari davom ettirilmoqda.